د اوبو او انرژي وزارت دوه تنه نوي ګومارل شوې رئيسان همکارانو ته ور وپېژندل شول
ښاغلی حافظ محمدکلیم منصور د برېښنا د څارنې او ارزونې رئيس په توګه او ښاغلی انجنیر اعجازالحق دانشیار د انرژي د انجنیري او مشورتي خدمتونو د رئيس په توګه په داسې حال کې چې د اوبو او انرژي وزارت ګڼ شمېر رئيسانو شتون درلود، د دې وزارت د دفتر عمومي رئيس ښاغلي قاري محمد عبدالعزیز عزیز له خوا همکارانو ته ور وپېژندل شول.
د اوبو او انرژي وزارت د دفتر عمومي رئیس د یادو رئيسانو د معرفي کولو په وخت کې په دولتي ادارو کې ادلون ، بدلون یو اصل وګاڼه او د نوي رئيسانو د بریالي او ځلانده شا لید ته په اشارې سره د دې بدلونونو موخه د چارو غوره مدیریت او تر سره کول وبلل.
د یادولو وړ ده، چې ښاغلی حافظ محمد کلیم منصور د آمریکایانو د اشغال په وخت کې ډېر کلونه د اوبو او انرژي وزارت د سرپرست وزیر ښاغلي ملا عبداللطیف منصور سره یوځای جهاد کړی او د مالي معتمد په توګه او همدارنګه یې د سپیڅلي جهاد په ډېرو نورو برخو کې کار کړی دی.
هغه د اسلامي نظام تر بریا او د هېواد تر خپلواکي وروسته، تر اوسه پورې د اوبو او انرژي په وزارت کې د بهرنیو اړیکو د آمر په توګه هېواد ته د خدمت رسولو په لاره کې ګڼ شمېر کړنې ترسره کړې او د یاد وزارت د اړیکو د پراختیا په برخه کې د نړیوالو بنسټونو او په هېواد کې د بهرنیو پانګوالو د پاملرنې د جلبولو په لاره کې اغېزمن کارونه ترسره کړي دي.
همدارنګه ښاغلي انجنیر اعجازالحق دانشیار د ننګرهار پوهنتون څخه د لیسانس سند لري او په بېلابېلو دولتي او خصوصي ادارو کې د شپږو کلونو څخه ډېره بریالۍ تجربه لري.
