په کابل ولایت کې د څه باندې ۳۰ میلیونه افغانیو په ټولیز ارزښت د ۱۱ چکډمونو پروژو د پلي کولو چارې پیل شوې
د نوموړو پروژو د پرانیستي مراسم د کابل ولایت په میر بچه کوټ ولسوالي کې د اوبو او انرژي وزارت سرپرست محترم الحاج ملا عبداللطیف منصور، د کابل والي محترم الحاج ملا امین الله عبید، د کابل سیندیزې حوزې عمومي رئیس انجنیر حبیب الرحمن حقپال، د منځني کابل سیندیزې فرعي حوزې رئیس مولوي ولي محمد تائب او د یو شمیر نورو تخنیکي مسئولینو په شتون کې ترسره شول.
د اوبو او انرژي وزارت سرپرست د نوموړو پروژو د پرانیستلو پر مهال د دغو پروژو د پلي کولو موخه د اوبو مدیریت، د کرنیزو اوبو چمتو کول او د ځمکې لاندې اوبو پیاوړتیا وبلله او زیاته یې کړه، چې ټولټال ۱۱ پروژې به د کابل ولایت په ۱۱ ولسوالیو کې پلي شي، چې د میربچه کوټ په ولسوالي کې د سیاب بالا چکډم له دې مجموعې څخه لومړۍ پروژه ده.
په ورته مهال، د کابل والي د اسلامي امارت د مسئولینو رښتینو خدمتونو ته په اشارې سره وویل، چې د خوښۍ ځای دی چې نن افغانستان د داخلي امکاناتو او ددې وطن د بچیانو په هڅو سره د آبادۍ او سوکالۍ په لور روان دی.
په دغه برنامه کې د کابل سیندیزې حوزې عمومي رئیس انجنیر حبیب الرحمن حقپال د نوموړو پروژو د ارزښت په هکله خبرې وکړې او له قراردادي شرکت څخه یې وغوښتل، چې د پروژو د کیفیت په برخه کې دې زیاته پاملرنه وکړي.
د یادونې وړ ده، چې له دې مخکي هم د اوبو او انرژي وزارت له لوري د کابل ولایت په دریو ولسوالیو کې د چکډمونو د درې پروژو چارې پیل شوې وې، چې له هغې جملې څخه په ګلدرې ولسوالي کې یوه پروژه بشپړه او په خاک جبار او سروبي ولسوالیو کې دوې نورې پروژې تر کار لاندې دي.
