ننګرهار ولایت کې د نږدې ۲ میلیونه آمریکایي ډالرو په ارزښت د اوبولګولو پروژې د پلي کولو درې اړخیز هوکړه لیک لاسلیک شو
![1](/sites/default/files/2024-04/img-20240423-wa0037.jpg)
د ننګرهار ولایت په نازیانو ولسوالي کې د اوبولګولو پروژې د پلي کولو درې اړخیز هوکړه لیک د 1.8 میلیونه آمریکایي ډالرو په ارزښت د ننګرهار مرستیال والي محترم مولوي سعید احمد بنوري، د ننګرهار سیندیزې حوزې رئيس محترم سید فضل احد هاشمي او د جاپان د پې، ام، اس موسسې مسؤلې آغلې فوجیتا ترمنځ لاسلیک شو.
د دغه هوکړه لیک پر بنسټ به په نازیانو ولسوالي کې د نوموړې موسسې له لوري د ننګرهار سیندیزې حوزې په چوکاټ کې د نهه کیلو متره په اوږدوالي سره څلور کانالونه، دوولس چینې او یو کاریز په بنسټیز ډول ورغول شي او د باران اوبو د ذخیره کولو په موخه اووه چکډمونه جوړ او په ټولیز ډول به ۱۸۰۶ جریبه ځمکه خړوبه شي.
د نوموړې موسسې په استازیتوب محترم انجنیر دیدار مشتاق د دغې پروژې په هکله اړین معلومات وړاندې کړل او زیاته یې کړه، چې د کانالونو د خوندیتوب او د اوبو د ضایعاتو د مخنیوي په موخه به استنادي دیوالونه، سیفونونه، د بستر استر کاري، پلې لارې، د اوبو د وېش دروازې، پلګوټي او نورې اړینې برخې هم جوړې شي.
په ورته مهال،د ننګرهار مرستیال والي د نوموړې موسسې له لوري په ننګرهار ولایت کې د اوبولګولو او روغتیایي پروژو د پلي کولو له کبله مننه او قدرداني وکړه او هغوی ته یې د ټولو چارو په ترسره کولو کې د هر راز همکاري ډاډ ورکړ.
همدغه راز، د ننګرهار سیندیزې حوزې رئيس محترم سید فضل احد هاشمي د جاپان د پې، ام، اس موسسې مسؤلینو ته د یادې پروژې په پلي کولو کې د همکاري ډاډ ورکړ او په دې برخه کې یې د یو شمېر نورو ورته پروژو د پلي کولو غوښتنه یې هم وکړه.
ټاکل شوې ده، چې د دغه اوبو لګولو پروژې چارې د روان زیږدیز کال په اپریل میاشت کې پيلیږي او د ۲۰۲۶ زیږدیز کال په سپټامبر میاشت کې پای ته ورسیږي، چې د پروژې ګټې اخیستنې ته تر سپارلو وروسته به نوموړې موسسه د پنځو کلونو لپاره د دغې پروژې حفظ او مراقبت وکړي او تر هغه وروسته به یې د ننګرهار سیندیزې حوزې له لوري ساتنه کېږي.