پکتیا ولایت کې د اوو پروژو د حفظ او مراقبت چارې د ۱۳ میلیونه افغانیو په ارزښت پیل شوې
د پکتیا ولایت په مرکز ګردیز او زرمت ولسوالي کې د کوتي خېلو او دولت زیو د اوبو ذخیرو پاکاري، د شاګوم خېلو د کانال د اوبو تقسیموونکي ودانۍ، د کوچني چرنګ سربند حفظ او مراقبت، د درنګ کانال حفظ او مراقبت ، د ګل بهار کانال د استنادي دېوال جوړونه او د حوض کانال او سربند د حفظ او مراقبت چارې د ۱۳ میلیونه افغانیو په ارزښت د پکتیا د سیندیزې فرعي حوزې رئيس محترم مولوي محمد کریم فاتح، د خوړو او کرنې نړیوالې ادارې د سهیل ختیځ زون مسؤل محترم بسم الله بسمل، پکتیا ولایت کې د ایف، اې، او ولایتي استازي محترم محمد عبدالقیوم سلیمان زي او یو شمېر قومي مشرانو په شتون کې پیل شوې.
د پکتیا سیندیزې فرعي حوزې رئيس د نوموړو پروژو د چارو په پرانیست غونډه کې د طبیعي سرچینو د ارزښت او مدیریت په هکله په مفصله توګه خبرې وکړې.
همدرانګه د خوړو او کرنې نړیوالي ادارې استازي د نوموړو پروژو په هکله اړین تخنیکي معلومات وړاندې کړل.
د یادونې وړ ده، چې د نوموړو پروژو چارې د خوړو نړیوال سازمان په مالي ملاتړ د پکتیا سیندیزې فرعي حوزې تر څارنې لاندې پرمخ وړل کېږي.
