د اوبو او انرژي وزارت د اوبو په معینیت کې د سترو قراردادونو د څېړلو ناسته ترسره شوه
د سترو قراردادونو د څېړلو د تېرو ناستو د لړۍ په دوام کې، دغه ناسته د اوبو او انرژي وزارت د اوبو معین محترم مجیب الرحمن عمر آخندزاده، د ټولګټو وزارت معین محترم مولوي عبدالکریم فاتح، د کلیو پراختیا وزارت معین محترم مولوي شرف الدین، د چارو ادارې عمومي ریاست د ملي تدارکاتو مرستیال محترم شیخ عبدالرحیم رحیمي او د یو شمېر نورو وزارتونو او اړوندو ادارو د استازو په شتون کې ترسره شوه.
په دغه ناسته کې د کندز ولایت د خان آباد۲ برېښنا بند پروژه، د پولي تخنیک پوهنتون د اوبو سرچینو او چاپېریال پوهنځي د درسي ودانۍ د جوړولو پروژه او د ملي پراختیا شرکت اړوند څو سترې پروژې تر مطالعې او څېړنې لاندې ونیول شوې.
د ناستې په بهیر کې، د هرې پروژې په هکله په جلا او مفصل ډول بحث او د اندونو تبادله وشوه او اړینې پرېکړې وشوې، ترڅو د اقتصادي کمېسیون سره شریکې شي.
