په کابل ښار کې د برېښنا رسولو شرکتونو د چوپړتیاوو د ارزونې لړۍ پیل شوه
د برېښنا انرژي د مارکیټ د تنظیم په موخه د برېښنا رسولو په سکتور کې د هغو شرکتونو چې په دغه برخه کې فعالیت لري او د اوبو او انرژي وزارت څخه جواز نه لري، د پيژندلو په موخه د برېښنا انرژي د خدمتونو د تنظیم لوی ریاست له خوا تخنیکي ټيمونو د برېښنا انرژي د مارکیټ د تخنیکي رئیس محترم انجنیر همت الله امین زی يې مشري کوي د کابل ښار له شپږمې ناحیې څخه د برېښنا رسولو د شرکتونو د چوپړتیاوو د ارزونې لړۍپیل کړه.
په همدې موخه نوموړي تخنیکي ټیم د برېښنا انرژي د خدمتونو د تنظیم لوی ریاست او د کابل ښاروالي د هوکړې پر اساس د کابل ښاروالي د شپږمې ناحیې له مشرتابه سره د هغوي په کاري دفتر کې وکتل.
په دغه لیدنه کې، دواړو لورو په یاده ناحیه کې د برېښنا رسوونکو شرکتونو د پیژندلو او د چوپړتیاوو د ارزونې په هکله بحث او د اندونو تبادله وکړه او د یادې پروسې په رغنده پلي کولو او د شرکتونو د پیژندلو په تګلارې یې خبرې وکړې او د اړینې همغږۍ په رامنځته کولو کې یو بل ته د همکاري ډاډ ورکړ.
وروسته ګډو تخنیکي ټیمونو د یادې ناحیې اړوند خپلې کاري چارې عملا پیل کړې.
