د افغانستان برېښنا شرکت دمدیره پلاوي دائمي غړی همکارانو ته ور وپېژندل شو
محترم الحاج مولوي فضل الرحمن سعید چې تردې مخکې یې د اوبو او انرژي وزارت د کورنۍ پلټنې د رئيس په توګه دنده ترسره کوله، د اوبو او انرژي وزارت د رهبري د لزوم دید او د ریاست الوزرا د عالي مقام د حکم پر بنسټ د اوبو او انرژي وزارت د دفتر د عمومي رئيس محترم قاري محمد عبدالعزیز عزیز له لوري همکارانو ته ور وپېژندل شو.
د اوبو او انرژي وزارت د دفتر عمومي رئيس د مولوي سعید د ورپېژندلو پر مهال د هغه پوهه، تجربې او کړنې وستایلې او هغه ته یې د خدای(ج) له دربار څخه نظام او هېواد ته د خدمت ترسره کولو د لازیاتو توفیقاتو غوښتنه وکړه.
د یادونې وړ ده، چې محترم الحاج مولوي فضل الرحمن سعید د منبع العلوم مدرسې څخه د لیسانس په کچه فارغ شوی او د اسلامي امارت په مخکینې دوره کې په احصائیه کې د ټولنیزې او دموګرافي د رئيس او همدارنګه د کابل ښاروالي د اتمې او دریمې ناحیو د رئيس په توګه دنده ترسره کړې ده.
ښاغلي سعید د اشغال په وړاندې د جهاد په پړوا کې درې ځله په بګرام زندان کې زنداني شوی او همدارنګه د پکتیا ولایت د زرمت ولسوالي د نظامي کمېسیون د مسؤل په توګه دنده ترسره کړې، چې په دې برخه کې یې کوتلي ګامونه پورته کړي او ډېرې ستونزې یې هم ګاللې دي.
