په اوبو او انرژي وزارت کې د جېوتکنیک او د لابراتوار څېړنې پنځلس ورځنی ښوونیز ورکشاپ پيل شو
دغه ښوونيز ورکشاپ د کارکوونکو د چارو رياست او د لابراتوارونو څېړنيز رياست لخوا د 5 سينيزو عمومي حوزو انجينرانو د وړتیا لوړونې لپاره په لاره اچول شوی او د اوبو او انرژي وزارت د دفتر عمومي رئيس قاري محمد عبدالعزيز عزيز، د اوبو د سکتور يو شمېر رئيسانو او نورو ګډونوالو په شتون کې پيل شو.
د اوبو او انرژي وزارت د دفتر عمومي رئیس د ورکشاپ د پيل په دوام کې د جیوتکنیک او څېړنيز ورکشاپ ارزښت ته په اشارې سره ټينګار وکړ چې دغه لابراتوار د پروژو د پلي کولو د کېفېت په تعينولو کې د اساسي حېثېت درلودونکی دی.
ښاغلي عزيز له انجينرانو څخه وغوښته چې د هغه په زدهکړه کې زيار او کوښښ وکړي تر څو وشي کولی چې له هغې څخه په ښه توګه ګټه واخلي.
له بلې خوا د اوبو د تأسيساتو د چوپړتياوو عمومي رئيس انجینر عبدالغفور عمري دغه ورکشاپ د انجینرانو د وړتيا لوړونې په برخه کې اړين وباله، يادونه يې وکړه چې د جېوتکنيک مطالعې د يوې پروژې د پلي کولو تر ټولو اساسي برخه ده.
هغه زياته کړه، تمه کېږي چې د وزارت د رهبري مقام د دغه لابراتوار د پرمختګ او لوړونې په برخه کې خپله پاملرنه ولري.
د ياډولو وړ ده چې په دغه ورکشاپ کې د پنځلسو ورځو لپاره د پنځو سينديزو عمومي حوزو 15 تنه انجينرانو ته به د جیوتکنیک علم، د موادو دانه بندي، د اتربیرک د حدودو تعیين، د موادو د ځانګړي وزن تعيين او د اوبو تأسيساتو د لابراتوارونو اړوند نورو موضوعاتو په برخو کې زدهکړې ورکړل شي.
