د اوبو بندوند د امکان سنجي مطالعاتو په هکله د اقتصادي کمیسیون نوبتي غونډه ترسره شوه
د اقتصادي کمیسیون نوبتي ناسته د ریئس الوزراء د اقتصادي مرستیال محترم ملا عبدالغني برادر آخند په مشرۍ په مرمرینه ماڼۍ کې ترسره شوه.
په دغهٔ ناسته کې د اوبو او انرژي وزارت له لوري په میدان وردګ ولایت کې د ګرومبي بند، په بلخ ولایت کې د قره تیري بند، په کندهار ولایت کې د شنه نري بند او په پکتیا ولایت کې د وچ نري بند د پروژو سروې او امکان سنجي وړاندې شوې. له هراړخیزې څېړنې وروسته، پرېکړه شوه چې د ۱۴۰۴ لمریز مالي کال په بودجه کې دغه پروژې شاملې شي.
او همدارنګه په دغهٔ ناسته کې د دشت الوان ۵۰۰ کېلو ولټ لېږد مزي، د بتخاک نوي سب سټېشن، د چمتلې سب سټېشن ۲۲۰ کېلو ولټ لېږد مزي غځول او د ارغندۍ سب سټېشن ۲۲۰ کېلو ولټ لین غځولو پروژو د چارو په چټکتیا باندې هم ټینګار وشو.
