د اوبو او انرژي وزارت د دفتر عمومي رئیس او د انرژي معینیت سرپرست د آلماني جي، آی، زیډ موسسې له پخواني رئیس سره وکتل
د اوبو او انرژي وزارت د دفتر عمومي رئیس او د انرژي معینیت سرپرست محترم قاري محمد عبدالعزیز عزیز په داسي حال کې چې د یاد وزارت د انرژي معینیت یو شمیر رئیسانو او تخنیکي مسئولینو شتون درلود د آلماني جي، آی، زیډ موسسې له پخواني رئیس او ورسره مل تخنیکي ټیم سره وکتل او د اوبو، ډبرو سکرو او بادي سرچینو څخه د برېښنا د تولید په برخه کې د پانګونې د جذبولو په هکله بحث او د اندونو تبادله وکړه.
په دغه لیدنه کې د اوبو او انرژي وزارت د دفتر عمومي رئیس وویل، چې ددغه وزارت په ټولو سطوحو کې د پانګوالو سره د همکاري او د هغوی د ستونزو د هوارولو لپاره ټینګه اراده او عزم شتون لري او پانګوالو ته مناسب قانوني چوکاټ او اړینې اسانتیاوي هم رامنځته شوې دي.
همدارنګه، په دغه لیدنه کې د دواړو هېوادونو ترمنځ د پانګونې فرصتونو په هکله هراړخیزې خبرې وشوې او د اوبو او انرژي وزارت د دفتر عمومي رئیس په بېلابېلو برخو په ځانګړې ډول د تجدید وړ انرژي په برخه کې د پانګونې د فرصتونو په هکله بشپړ معلومات وړاندې کړل او ویې ویل، چې افغانستان د انرژي د پراخو سرچینو په درلودلو سره د پانګونې لپاره یو ښه فرصت دی.
په ورته مهال، د جي، آی، زیډ آلماني موسسې پخواني رئیس هم د اوبو او انرژي وزارت د دفتر عمومي رئیس سره د برېښنا د تولید په برخه کې د آلماني پانګوالو د جذبولو لپاره د همکاري ژمنه وکړه.
