د غزني درنو ولسونو ته ښه زیری
د وروستیو اورښتونو له کبله د غزني ولایت د سلطان بند د اوبو په کچه کې د پاموړ زیاتوالی راغلی چې په دغه ولایت کې د اوبیزو سرچینو په وضعیت کې د غورهوالي ښکارندویي کوي.
په اوبیزو زېرمو کې دغه زیاتوالی، د کرنیزو ځمکو د اوبولګولو، د کرنیزو تولیداتو د ودې او د خوړو ثبات د پیاوړتیا لپاره غوره فرصتونه رامنځته کړي او همدارنګه د اوبو سرچینو په اغېزمن مدیریت کې به کارنده رول ولوبوي.
د یادونې وړ ده، چې د سلطان بند د ساتنې، مراقبت او پراختیا پروژه تېر کال د اوبو او انرژي وزارت له لوري په لاره اچول شوې او اوسمهال یې هم چارې په منظم ډول روانې دي، چې په بشپړېدو سره به یې د بند لوړوالی له ۳۵ مترو څخه ۳۷.۵ مترو او د زېرمې وړتیا یې له ۹ میلیون متر مکعب څخه ۱۳ میلیون متره مکعب ته لوړه شي، چې په ټوله کې به کابو ۱۰ زره هکتاره کرنیزه ځمکه تر اوبولګولو لاندې راشي.
