د اوبو او انرژي وزارت د اوبو معین د قزاقستان جمهوریت له سفیر سره د ګډو همکاریو د پراختیا په هکله خبرې وکړې
13 شوال 1447 هـ ق
11 حمل 1405 هـ ش
د اوبو او انرژي وزارت د اوبو معین محترم مجیب الرحمن عمر آخندزاده د خپل کار په دفتر کې، په کابل کې مېشت د قزاقستان له سفیر محترم ګازیز اکباسوف سره وکتل او د دواړو هېوادونو ترمنځ د ګډو همکاریو د پراختیا په ځانګړې توګه د اوبو او انرژي په هکله خبرې اترې وکړې.
په دغه لیدنه کې، د اوبو او انرژي وزارت د اوبو معین د اوبو او انرژي په برخه کې د دوه اړخیزو همکاریو د پراختیا او د اوبو او برېښنا په برخه کې د تجاربو د تبادلې او له وړتیاوو څخه د اغېزمنې ګټې اخیستنې په موخه د دغه وزارت چمتووالی څرګند کړ.
همدارنګه، هغه د اوبو سرچینو د مدیریت او د انرژي د پایدارې پراختیا په برخه کې د سیمې د همکاري رول اړین وباله او په افغانستان کې د اوبو سرچینو او د انرژي د مدیریت په پروژو کې د بهرنۍ پانګونې لپاره د مناسبو شرائطو او د آسانتیاوو یادونه وکړه.
له بلې خوا، د قزاقستان هېواد سفیر هم له افغانستان سره د همکاریو او اړیکو د پراختیا هرکلی وکړ، او په افغانستان کې د اوبو او انرژي په پروژو کې د پانګونې په برخه کې ټینګار وکړ او د دواړو هېوادونو ترمنځ د علمي او تخنیکي همکاریو په برخه کې ډاډ ورکړ.
په پای کې، دواړو لورو د خبرو اترو د دوام پر لزوم او په یادو برخو کې د افغانستان او قزاقستان ترمنځ د همکاریو پر پیاوړتیا باندې ټینګار وکړ.
