د انرژي معینیت اونیزه ادارې او تخنیکي ناسته ترسره شوه
دغه ناسته د انرژي معینیت د غونډو د سرپرست او د پایدارې انرژي د عمومي رئيس محترم مولوي عزیزالله سهار تر مشري لاندې د دغه معینیت د رئيسانو، سلاکارانو او د یو شمېر تخنیکي مسؤلینو په شتون کې ترسره شوه.
د ناستې په بهیر کې، په غور ولایت کې د برېښنا رسونې په پروژه کې د پانګونې د چارو د وضعیت د پرمختګ، د انرژي په پروژو کې د خصوصي پانګونې په برخه کې د آزادې سیالۍ لپاره د زمینې د چمتوکولو په موخه د اړینو آسانتیاوو رامنځته کول، د کمېټو ترمنځ د نویو پروژو د پېژندنې، سروې او ډیزاین په برخه کې د همغږیو رامنځته کول او د ۱۰۰ میګاواټه لمریزې برېښنا په پروژه کې له عوفي بهرام شرکت سره د پانګونې د چارو په پرمخ وړلو کې د همکاري په هکله بحث او د اندونو تبادله وشوه.
د ناستې په بهیر کې، رئيسانو او مسؤلینو د نوموړو موضوعاتو په هکله خپل معلومات او اندونه وړاندې کړل او د چارو د لا غوره پرمخ وړلو په موخه اړین تصمیمونه ونیول شول.
