د اوبو او انرژي سرپرست وزیر بادغیس ولایت ته د دغه ولایت د اوبیزو سرچینو د لیدلو په موخه په سفر ولاړ
د اوبو او انرژي سرپرست وزیر محترم الحاج ملا عبداللطیف منصور په داسې حال کې چې د هریرود- مرغاب سیندیزې حوزې عمومي رئيس محترم مولوي عبدالسلام مستوفي آغا، د لاندني هریرود- مرغاب سیندیزې فرعي حوزې رئيس محترم مولوي سردار ولي مزمل او تخنیکي ټیم په ملتیا ، بادغیس ولایت ته د دغه ولایت د اوبیزو سرچینو د لیدلو په موخه په سفر ولاړ.
په دغه سفر کې، د اوبو او انرژي سرپرست وزیر له مرغاب سیند څخه د لېدنې او د دغه سیند د اوبو د مدیریت او د اوبو ذخیره کولو بندونو جوړولو د تخنیکي مطالعاتو، د برېښنا تولید او د اوبو لګولو کانالونو د سمون په برخه کې د همکاري د ژمنې ترڅنګ یې د بادغیس له مرستیال والي محترم مولوي غلام محمد او یو شمېر نورو ملکي او نظامي مسؤلینو سره وکتل او په دغه ولایت کې یې د اوبیزو سرچینو د مدیریت او برېښنا د تولید په هکله خبرې، اترې وکړې.
همدغه راز، د اوبو او انرژي سرپرست وزیر په دغه سفر کې د مرغاب سیندیزې فرعي حوزې له مسؤلینو سره لیدنه وکړه او د هغوی د ستونزو اورېدو ترڅنګ، هغوی ته یې لارښوونه وکړه چې ورسپارل شوې دندې په بشپړه ریښتینولۍ او پر وخت سره ترسره کړي او زیاته یې کړه، چې اسلامي امارت د ټولګټو خدمتونو د ترسره کولو په ځانګړې توګه د اوبو د مدیریت او د اوبیزو تاسیساتو د ساتنې په برخه کې ټینګ هوډ لري.
