د اوبو او انرژي سرپرست وزیر د نیمروز له والي سره وکتل
د اوبو او انرژي سرپرست وزیر محترم الحاج ملا عبداللطیف منصور د خپل کار په دفتر کې د نیمروز له والي محترم شیخ محمد قاسم خالد سره وکتل او په هغه ولایت کې د اوبو او انرژي پروژو د پلي کولو په هکله یې خبرې وکړې.
په دغه لیدنه کې، د نیمروز والي د اوبو او انرژي وزارت کړنې د ستایلو وړ وبللې او د هېواد په بېلابېلو ولایتونو کې د چکډمونو د پروژو په لاره اچول او پلي کول يې د اوبو د مدیریت او د ځمکې لاندې اوبو سرچینو د پياوړتیا په برخه کې یو مثبت ګام وباله. همدارنګه، هغه په دغه لیدنه کې د اوبو او انرژي پروژو په برخه کې د نیمروز ولایت د خلکو ستونزو ته اشاره وکړه او د وزارت د رهبري مقام څخه یې د همکاري غوښتنه وکړه.
د اوبو او انرژي سرپرست وزیر د نیمروز والي ته ډاډ ورکړ، چې د شته امکاناتو په پام کې نیولو سره به د هغوی ستونزو ته رسیدګي وشي.
