د اوبو او انرژي سرپرست وزیر د کابل له والي او د هېواد له یو شمېر علماوو سره وکتل
د اوبو او انرژي سرپرست وزیر محترم الحاج ملا عبداللطیف منصور د خپل کار په دفتر کې د هېواد له یو تن مشهورو علماوو او د کابل د علماوو رئيس محترم خلیفه دین محمد، د کابل له والي محترم حاجي امین الله عبید او د دغه ولایت د علماوو شورا له مرستیال سره وکتل.
په دغه لیدنه کې، د کابل والي، د علماوو شورا رئيس او مرستیال د اوبو او انرژي وزارت د کړنو ستاینه وکړه او د دغه وزارت د رهبري مقام ته د لا زیاتو توفیقاتو غوښتنه وکړه.
په ورته مهال، د اوبو او انرژي سرپرست وزیر د اوبو سرچینو او د انرژي پراختیا حیاتي ارزښت ته په اشارې سره وویل، چې دغه وزارت به د دغو دوو سکتورونو د ودې لپاره شپه او ورځ هڅې وکړي.
د یادونې وړده، چې په دغه لیدنه کې د کابل د خلکو د بېلابېلو موضوعاتو په هکله بحث او د اندونو تبادله وشوه. همدارنګه د غازي بند د پاکاري په هکله چې د خلکو له لوري د علماوو شورا ته وړاندیز شوی وو، پرېکړه وشوه چې د کابل د اوبو او انرژي ریاست یو تخنیکي پلاوی دې وټاکل شي، ترڅو د نوموړي بند په هکله هر اړخیز معلومات وړاندې کړي او تر هغه وروسته اړین تصمیمونه ونیول شي.
