د اوبو او انرژي سرپرست وزیر په افغانستان کې د قطر هېواد د سفارت له مستشار سره وکتل
د اوبو او انرژي سرپرست وزیر محترم الحاج ملا عبداللطیف منصور د خپل کار په دفتر کې د قطر هېواد د سفارت له مستشار محترم دوکتور مردف علي القاشوطي او مل پلاوي سره وکتل او پر یو شمېر موضوعاتو باندې یې بحث او د اندونو تبادله وکړه.
د اوبو او انرژي سرپرست وزیر په دغه لیدنه کې، د قطر هېواد د سفارت مستشار او مل پلاوي ته د ښه راغلاست ترڅنګ، د قطر هېواد څخه مننه وکړه، چې له آمریکایانو سره یې د مذاکراتو پر وخت له دوی سره اړینه همکاري ترسره کړې چې په پایله کې يې افغانستان له امریکایي اشغال څخه خلاص او خپلواک شو.
همدغه راز، د اوبو او انرژي سرپرست وزیر په دغه لیدنه کې، د دغه وزارت یو شمېر پروژو ته اشاره وکړه او زیاته یې کړه، چې اوس په افغانستان کې له هره پلوه د پانګونې لپاره زمینه چمتو ده او له هغوی څخه یې وغوښتل، چې په افغانستان کې د اوبو او انرژي په پروژو کې د پانګونې په موخه د قطر هېواد د خصوصي پانګوالو د پانګونې په جذبولو کې همکاري وکړي.
په ورته مهال، د قطر هېواد د سفارت مستشار ښاغلي القاشوطي په دغه لیدنه کې د اوبو او انرژي له سرپرست وزیر سره ژمنه وکړه، چې په افغانستان کې د اوبو او انرژي په پروژو کې د پانګونې په برخه کې به د قطر هېواد د خصوصي شرکتونو د پانګونې د جذب په برخه کې اړینه همکاري وکړي.
