د اوبو او انرژي وزارت سرپرست د لوی اختر د مبارکۍ په ناسته کې پر اخلاص او مسؤولیت منلو ټینګار وکړ
د اوبو او انرژي سرپرست وزیر محترم الحاج ملا عبداللطیف منصور د دغهٔ وزارت رئیسانو او کارمندانو ته په یوه غونډه کې د لوی اختر مبارکي ورکړه او د دغهٔ اختر د دیني لارښوونو پر اهمیت، د اسلام د دین په ساتلو او د هېواد د آبادولو په لاره کې یې د قربانيو او فداکاریو پر ارزښت ټینګار وکړ.
نوموړي په دغهٔ ناسته کې، د لوی اختر مبارکې ورځې د ارزښتمنو دیني لارښوونو څخه ډکې وبللې چې د اسلام دین په اطاعت باندې ټینګار لري. هغه یادونه وکړه چې مسلمانان باید تل د دین ساتلو او اسلامي نظام په لاره کې قرباني ورکولو ته تیار واوسي.
د اوبو او انرژي وزارت سرپرست د ناټو او آمریکایي ځواکونو د نیواک ۲۰ کلنې دورې ته اشاره وکړه او ؤ یې ویل: "متأسفانه په هغه دوره کې د افغانستان د خلکو عاشورا او اختر یو ډول وو او د دغې خاورې خلک آن د اختر په ورځو کې هم د خپلو ځوانانو د شهادت شاهدان وو او د خپل ژوند د خوښیو ورځې یې هم د خپلو عزیزانو په ویر کې تېرولې، خو له نیکه مرغه په وروستیو څلورو کلونو کې، د اسلامي نظام په برکت، خلک د اختر ورځې په خوښۍ سره په بشپړ آرامښت او آمنیت کې لمانځي".
ښاغلي منصور د وزارت رئیسانو او تخنیکي مسؤولینو ته په خطاب کې ټینګار وکړ چې اوس مهال په هېواد کې د علمي او مسلکي ودې لپاره زمینه برابره ده او ددې وخت را رسېدلی تر څو د افغانستان د پرمختګ او ځان بساینې لپاره هڅې وشي. هغه له مسؤولینو وغوښتل چې اخلاص او مسؤولیت منل د خپلې دندې عنوان وګرځوي او د هېواد د آبادولو په لاره کې په صداقت او فداکاري سره هڅې وکړي.
هغه همدارنګه د وروستیو کلونو وچکالیو ته اشاره وکړه او ؤ یې ویل: "د اوبو د مدیریت په برخه کې خدمت کول، نن له بل هر وخت څخه لا زیاتو هڅو ته اړتیا لري".
د اوبو او انرژي وزارت سرپرست په دوام کې زیاته کړه: "د اسلام دښمنان په ځانګړې توګه د افغانستان د خلکو دښمنان، په خپلو دروغجنو تبلیغاتو سره، تل د تفرقې اچونې او د اسلامي نظام څېرې د تحریب لپاره په لټه کې دي. د افغانستان له شریف ولس څخه تمه کېږي چې ددغو توطئو پر وړاندې هوښیار واوسي او په خپل صادقانه ملاتړ سره د اسلامي نظام په ساتلو او د هېواد په آبادولو کې ثابت قدمه پاتې شي.
دغه ناسته د خیر په دعا سره پای ته ورسېدله.
