د اوبو او انرژي وزارت سرپرست وزیر د یوه مطبوعاتي کنفرانس په ترڅ کې د دغه وزارت کړنې او لاسته راوړنې د رسنیو په شتون کې وړاندې کړل
د اوبو او انرژي وزارت سرپرست وزیر ښاغلي ملا عبداللطیف منصور د یوه مطبوعاتي کنفرانس په ترڅ کې چې د حکومت د رسنیو په مرکز کې جوړ شوی و، د وزارت د کړنو او لاسته راوړنو په هکله مفصل معلومات د رسنیو په شتون کې وړاندې کړل.
د اوبو او انرژي وزارت سرپرست وزیر په یاد مطبوعاتي کنفرانس کې د یوې واحدې، منظمې، کارنده او مسلکي تشکیلاتو رامنځته کولو، د اوبو او انرژي په سکتورونو کې د ملي او نړیوالو پانګوالو جلبولو، د مسلکي کدرونو ساتنه او ګمارنه، ګانډیو هېوادونو ته د برېښنا پورونو ورکړه، د وارداتي برېښنا قراردادونو غزونه، د اوبو او انرژي قانوني کیدل او د۱۰۰ میګاواټه برېښنا د تولید په وړتیا د کجکي بند پروژې د دوهم فاز بشپړېدل یې د دغه وزارت له مهمو لاسته راوړنو څخه یاد کړل.
ښاغلي منصور د خپلو خبرو په دوام کې د هلمند سیند تړون ته اشاره وکړه او زیاته کړه" د اوبو او انرژي وزارت د ایران د حقابې د تامین په برخه کې د یاد تړون سره سم عمل کوي". هغه زیاته کړه چې د سختې وچکالي له امله د هېواد اوبه کمې شوې او دې موضوع د هېواد کروندګرو او هم د ایران د حقابې د تامین په برخه کې د پام وړ ستونزې رامنځته کړې دي، خو د اوبو او انرژي وزارت له ایران سره د دواړو هېوادونو د ګډو کمیشنرانو په کچه د پرله پسې ناستو په ترڅ کې دغه ستونزه هواره کړې ده.
د اوبو او انرژي وزارت سرپرست و زیر په کابل ښار کې د ځمکې لاندې اوبو سرچینو د مدیریت په هکله وویل چې له پنچشیر څخه کابل ته د اوبو رسولو پروژې د پلي کیدو لپاره له ګڼو پانګوالو سره خبرې شوې او له نېکه مرغه یو شمېر یې په دې برخه کې د خپلې پانګونې لېوالیتا ښودلې ده. همدارنګه د للندر- شاتوت پروژې د پلي کیدو لپاره هم له قراردادي شرکتونو سره لازم اقدامات او همغږي دوام لري؛ ترڅو چارې یې په عملي توګه پيل شي.
د کنفرانس په پای کې، په هېواد کې د انرژي د تولید او د اوبو مدیریت د پروژو د پلي کیدو په برخه کې د دغه وزارت د کړنو او پلانونو په هکله د خبریالانو له خوا ګڼې پوښتنې مطرح شوې، چې د اوبو او انرژي وزارت سرپرست وزیر دغو ټولو پوښتنو ته په رښتیني او مسؤلانه ډول ځوابونه وړاندې کړل.
