د اوبو او انرژي په وزارت کې د اوبو چارو د تنظیم د اړوندو طرحو په هکله د نظر غوښتنې ناسته ترسره شوه

یاده ناسته د اوبو او انرژي وزارت د سرپرست وزیر ښاغلي ملا عبداللطیف منصور تر مشري لاندې د وزارت د رئيسانو، سلاکارانو،تخنیکي مسؤلینو، د ښار جوړونې، مالیې، اوبو لګولو او اوبو رسولو، کلیو پراختیا، اقتصاد وزارتونو، د رښاروالیو عمومي ریاست، د کابل ښاروالي، د چاپيریال ساتنې، د ښاري اوبو رسولو او فاضلاب شرکت استازو او نورو اړوندو ادارو د استازو په ګډون ترسره شوه.

په یاده ناسته کې، د کابل ښاریانولپاره د څښاک اوبود تامین طرحه، د ځمکې لاندې اوبوسرچینوڅخه د تعرفې یا اجورې طرحه، د باران اوبو د راټولولوپه کارولو سره د ځمکې لاندې اوبو د تغذیې طرحه، د کرنې او سرسبزي په موخه د فاضلابو د تصفیې طرحه او د اوبو د سپما په موخه د عامه پوهاوي طرحه چې د افغانستان اسلامی امارت د ۲ مصوبې د 10/1/1444 نیټې پر بنسټ د اوبو او انرژي وزارت له خوا ترتیب او له ټولواړوندو وزارتونو سره شریک شوی وو، نظر غوښتنه ترسره شوه.

د اړوندو وزارتونو او ادارو استازو په یاده ناسته کې د یادو ترتیب شویو طرحو هر کلی وکړ او څرګنده یې کړه چې ټولې طرحې یې مطالعه کړې او د هغه د غوره والي لپاره خپل نظرونه د اوبو او انرژي وزارت له مسؤلینو سره شریک کړي دي.

د یادې ناستې په پای کې هوکړه وشوه چې د وزارتونو استازي په جلا توګه د اوبو او انرژي وزارت د یادو طرحو له ترتیب کوونکي کمیټې سره په ګډه کار وکړي ترڅو د وزارتونو او اړوندو ادارو مهم او اړین نظرونه په یادو طرحو کې شامل شي او د هغه نهایي او غوره والي باندې کار وشي.