د قرغې بند د ساتنې او مراقبت پروژه بشپړه او پرانیستل شوه
یاده پروژه د کابل سیندیزې عمومي حوزې رئيس محترم انجنیر حبیب الرحمن حقپال، د اوبو تاسیساتو د انجنیري خدمتونو عمومي رئيس محترم انجنیر عبدالغفور عمري، د انرژي خدمتونو عمومي رئيس محترم ډاکټر محمد عابد انورزی، د کابل منځنۍ سیندیزې فرعي حوزې رئيس محترم ولي محمد تائب، د پغمان ولسوالي د ولسوال مرستیال محترم مولوي محمد یعقوب حقاني، د اطلاعاتو او نشراتو رئیس محترم الحاج غلام جیلاني حق پرست او د اوبو او انرژي وزارت او یو شمېر رئيسانو او مسؤلینو په شتون کې پرانیستل شوه.
د یادې برنامې په پيل کې د کابل منځنۍ سیندیزې فرعي حوزې رئيس محترم مولوي ولي محمد تائب میلمنو ته ښه راغلاست وویل او د دې پروژې پرانیسته یې د اوبو د مدیریت او د اوبه ییزو تاسیساتو په برخه کې یو ارزښتناک ګام و باله.
د پروګرام په دوام کې، د کابل سیندیزې عمومي حوزې رئيس محترم انجنیر حبیب الرحمن حقپال د دې پروژې په پرانیست غونډه کې د کابل ښار د سطحي او ځمکې لاندې اوبو د وضعیت په هکله خبرې وکړې او د یادې پروژې موخو او ارزښت ته د اشارې ترڅنګ، د دې پروژې پلې کول یې د قرغې بند د ساتنې او مراقبت په برخه کې یوه ښه لاسته راوړنه یاده کړه.
همدارنګه د پغمان ولسوالي د ولسوال مرستیال محترم مولوي محمد یعقوب حقاني د اسلامي امارت د لاسته راوړنو په هکله لنډه اشاره وکړه او یادونه یې وکړه چې د افغانستان خلک به په راتلونکي کې په هره برخه کې د اسلامي امارت د لازیاتو لاسته راوړنو شاهدان و اوسي.
په پای کې د اوبو او انرژي وزارت د اطلاعاتو او نشراتو رئيس محترم الحاج غلام جیلاني حق پرست د خلکو ترمنځ د یووالي د ارزښت او د خلکو او حکومت تر منځ همکاري ته په لنډه توګه اشاره وکړه او په دعا کولو سره یې دغه برنامه پای ته ورسوله.
