د نغلو د ۱۰ میګاواټه لمریزې برېښنا پروژه ګټې اخیستنې ته وسپارل شوه
د دغې پروژې ګټې ته د سپارلو غونډه د اوبو او انرژي د سرپرست وزیر محترم الحاج ملا عبداللطیف منصور، د چارو د ادارې عمومي رئيس محترم شیخ نورالحق انور، د کابل والي محترم حاجي امین الله عبید، د وزارت د مقام سلاکار محترم ډاکټر فاروق اعظم، د کډوالو او بېرته راستنېدونکو وزارت معین محترم مولوي عبدالرحمن راشد، د عوفي بهرام شرکت رئيس محترم حاجي پهلوان، د افغانستان اسلامي امارت د لوړ پوړو مسؤلینو، بهرنیو او کورنیو پانګوالو او د ګڼ شمېر ځایي اوسېدونکو په شتون کې د کابل ولایت په نغلو کې ترسره شوه.
د اوبو او انرژي سرپرست وزیر د دغې پروژې ګټې ته د سپارلو په غونډه کې وویل، چې دغه وزارت خپله پاملرنه د برېښنا انرژي د تولید په برخه کې کورنیو سرچینو ته ډېره کړې او په پام کې لري، چې د هېواد په اکثره ولایتونو کې د نوي کېدو وړ انرژي پروژې پلي کړي.
په ورته مهال، د چارو د ادارې عمومي رئيس محترم شیخ نورالحق انور، اوسني شرایط د هېواد د آبادۍ او ځان بسیاینې لپاره تر ټولو ښه شرایط و بلل او ټینګار یې وکړ، چې هغه وخت را رسېدلی چې د افغانستان ټول خلک په پوره ډاډ سره د یو بل په څنګ کې د هېواد د آبادۍ لپاره هڅې وکړي.
همدغه راز، د کابل والي حاجي امین الله عبید هم په دغه غونډه کې پانګوالو ته بلنه ورکړه او ډاډ یې ورکړ، چې اسلامي امارت پانګوالو ته د هر اړخیزې همکاري په ترسره کولو کې ژمن دی.
همدارنګه، د عوفي بهرام شرکت رئيس حاجي پهلوان په دغه غونډه کې له پانګوالو سره د اسلامي امارت همکاري وستایله او یادونه یې وکړه، چې په افغانستان کې له هره پلوه د پانګونې لپاره زمینه چمتو ده.
په ورته مهال، د وزارت د مقام سلاکار محترم ډاکټر فاروق اعظم هم وویل، چې د خوښي ځای دی ، چې هره ورځ په هېواد کې د انرژي د پراختیا په برخه کې د مثبتو ګامونو د اخیستلو شاهدان یو.
د غونډې په دوام کې، د جي، ایس، پي شرکت مسؤل د پروژې د پلي کولو د څرنګوالي په هکله معلومات وړاندې کړل.
دغه پروژه د اوبو او انرژي وزارت له لوري د عوفي بهرام شرکت په خصوصي پانګونې سره د 7.6 میلیونه آمریکایي ډالرو په لګښت د ګرین سټیټ پاور له لوري پلي شوې ده.
د دغې پروژې په پلي کېدو سره په کابل او ننګرهار ولایتونو کې زمونږ د هېوادوالو ۱۰ زره کورنۍ د برېښنا له نعمت څخه برخمن کېږي.
