د یوه ترکي شرکت مسؤلینو د اوبو او انرژي له سرپرست وزیر سره په لیدنه کې د انرژي د تولید په پروژو کې پانګونې ته لېوالتیا څرګنده کړه
د اوبو او انرژي سرپرست وزیر محترم الحاج ملا عبداللطیف منصور د ترکیې هېواد د «مگما» سوداګریز شرکت له مسؤلینو سره وکتل او په افغانستان کې د انرژي تولید په پروژو د پانګونې په هکله بحث او د اندونو تبادله وکړه.
په دغه لیدنه کې، د نوموړي شرکت مسؤلینو وویل، چې چمتو دي تر څو په افغانستان کې د انرژي تولید په پروژو کې پانګونه وکړي.
د اوبو او انرژي سرپرست وزیر د نوموړي شرکت د لېوالتیا ستایلو ترڅنګ، یادونه وکړه چې اوسمهال له هره پلوه په افغانستان کې د پانګونې لپاره زمینه چمتو ده.
ښاغلي منصور د نوموړي شرکت مسؤلینو ته د دغه وزارت له لوري د هر راز همکاري ډاډ ورکړ.
