میدان وردګ ولایت کې د 4.5 میلیونه افغانیو په ارزښت د یوه چکډم د جوړېدو چارې پیل شوې
د میدان وردګ ولایت د دایمیرداد ولسوالي په دورانیو کلي کې د یوه چکډم د جوړېدو چارې د 4.5 میلیونه افغانیو په ارزښت د میدان وردګ د سیندیزې حوزې رئيس او یو شمېر نورو سیمه ییزو مسؤلینو او ځایي خلکو په شتون کې پیل شوې.
د نوموړي چکډم د چارو په پرانیست غونډه کې د میدان وردګ سیندیزې حوزې رئيس محترم مولوي عبدالصمد حلیم وویل چې دغه چکډم د اوبو او انرژي وزارت په مالي لګښت د 50 متره اوږدوالي او 7.5 متره لوړوالي سره جوړیږې او چارې به یې د دریو میاشتو په موده کې بشپړې او ګټې اخیستنې ته وسپارل شي.
په ورته مهال، ښاغلي حلیم د نوموړې سیمې اوسیدونکو ته د هر ډول همکاري ډاډ ورکړ او ویې ویل، چې د اسلامي امارت مشران ژمن دې، ترڅو په پراختیایي، اقتصادي او ځانګړې ډول د اوبو مدیریت په برخه کې د پام وړ خدمتونه ترسره کړي.
د یادونې وړ ده، چې په تېر یو کال کې په میدان وردګ ولایت کې د اوبو مدیریت په برخه کې ۸ چکډمونه جوړ او ګټې اخیستنې ته سپارل شوې او په دې برخه کې لا هم هڅې روانې چې د دغه ولایت اوبه په بشپړ ډول مهار شي.
