په اوبو او انرژي وزارت کې د انرژي اغېزمنتیا او ساتنې( د انرژي سپما) په هکله د پوهاوي ورکولو برنامه ترسره شوه
دغه برنامه د اوبو او انرژي وزارت د انرژي ساتنې او اغېزمنتیا ریاست له لوري د دغه وزارت د غونډو په عمومي تالار کې د اوبو او انرژي وزارت د ټولو رئيسانو، سلاکارانو او کارمندانو په شتون کې ترسره شوه.
د برنامې په بهیر کې د وزارت مقام سلاکار محترم ډاکټر فاروق اعظم، د اوبو او انرژي وزارت د دفتر عمومي رئيس محترم قاري محمد عبدالعزیز عزیز، د پایدارې انرژي عمومي رئيس محترم مولوي عبدالرحمن رحماني او د وزارت د دعوت او ارشاد رئيس محترم مولوي ګل رحمن عارف په خپل وار سره د اسلام له انده د اسراف د غندلو او د اوبو او انرژي سپما د ارزښت په هکله خبرې وکړې.
په ورته مهال، ډاکټر انجنیر محمد عمر تیموري له سلواکیا هېواد څخه د ودانیزې انرژي ساتنې برخې متخصص په دغه برنامه کې د یوه پرزنټيشن په ترڅ کې د انرژي ساتلو له پلوه د ودانیو د معیارونو په هکله خبرې وکړې.
د برنامې په دوام کې د اوبو او انرژي سکټورونو دوه تنه انجنیرانو د دغو دوو حیاتي توکو( اوبه او انرژي) د ارزښت او سپما د څرنګوالي په هکله اړین معلومات له ګډونوالو سره شریک کړل.
