په جوزجان ولایت کې د ګازو له سرچینو څخه د برېښنا د تولید په پروژه کې د پانګونې په هکله د ټاکل شوې کمېټې او د ګلبهار انویسټ شرکت د مسؤلینو ترمنځ د همغږۍ ناسته ترسره شوه
دغه ناسته د پایدارې انرژي د عمومي رئيس محترم مولوي عزیزالله سهار تر سرپرستي لاندې د ګلبهار انویسټ شرکت د رئيس محترم ګلبهار حبیبي، د امارتي شرکتونو، د کانونو او پټرولیم وزارت او د افغانستان برېښنا شرکت د استازو او د انرژي معینیت د یو شمېر نورو مسؤلینو په شتون کې ترسره شوه.
د ناستې په بهیر کې، د چارو د پرمخ وړلو په برخه کې د همغږیو د رامنځته کولو او په جوزجان ولایت کې د ګازو له سرچینو څخه د ۱۰۰ تر ۷۰۰ میګاواټه په وړتیا د برېښنا د تولید په پروژه کې د ګلبهار انویسټ شرکت د پانګونې لپاره د اړینو آسانتیاوو د چمتوکولو په موخه بحث او د اندونو تبادله وشوه.
د موضوعاتو تر هر اړخیزې ارزونې او د چارو د ترسره کولو او د پانګونې د بهیر د چټکتیا په برخه کې د کمېټې د غړو د اندونو تر وړاندې کولو وروسته، اړین تصمیمونه ونیول شول؛ ترڅو ډېر ژر د پانګونې او د نوموړې پروژې د پلي کولو په موخه عملي اقدامات پيل شي.
