په میدان وردګو ولایت کې د 5 میلیونه افغانیو په ارزښت د (بند آب همبستګي طبعیت) تر عنوان لاندې د اوبو بند د جوړولو چارې پیل شوې
د میدان وردګو ولایت په لومړۍ حصه بهسود ولسوالي کې د ولایتي مسؤلینو او سیندیزې حوزې سره په همغږۍ د 5 میلیونه افغانیو په ارزښت د ولسونو او پانګوالو په شخصي لګښت د (بند آب همبستګي طبعیت) تر عنوان لاندې د اوبو بند جوړولو چارې د میدان وردګو والي محترم قاري بختیار معاذ، مرستیال والي محترم مولوي سیدالرحمن حافظ، د بامیان ولایت والي محترم مولوي عبدالله سرحدي، د میدان وردګو سیندیزې فرعی حوزې رئیس محترم مولوي عبدالصمد حلیم او یو شمیر نورو سیمه ییزو مسئولینو په شتون کې پیل شوې.
د میدان وردګو ولایت والي وویل، چې دا د الله تعالی یو لوی نعمت دی چې د اسلامي نظام تر حاکمیت لاندې د امن په فضا کې د ولسونو په مالي لګښت ددغې پروژې پرانیسته کوو او له ولسونو څخه یې وغوښتل چې د دې ډول پروژو د پلې کولو په برخه کې دې له اسلامي امارت سره په همغږۍ کار وکړي.
په ورته وخت کې د بامیان والي وویل، چې د اسلامي امارت ټول خدمتونه هېوادوالو ته یو شان وړاندې کیږي او حق حقدار ته سپارل کیږي او له ولسونو یې هیله وکړه چې د اسلامي امارت سره په ټولو برخو کې همکاري وکړي.
دغه راز د میدان وردګو سیندیزې فرعي حوزې رئيس وویل، چې د هېواد په کچه د اوبو او انرژي وزارت او ولسونو لخوا د ګڼ شمیر پروژو د پلي کولو چارې روانې دي.
د یادونې وړ ده، چې یاد بند د 12 متره په لوړوالي او 200 متره په اوږدوالي سره جوړیږي، چې د 2 میلیونه متره مکعب اوبو د زیرمه کولو وړتیا به ولري او د تفریحي چاپيریال د لرلو ترڅنګ ډیرو کورنیو ته به د څښاک اوبه چمتو او کرنیزې ځمکې به هم خړوبې کړي.
