ولسمشر محمد اشرف غني د اوبو د چارو د تنظیم ملي ادارې کړنې وارزولې!
د اوبو د چارو د تنظیم ملي ادارې لوی رئيس ښاغلي انجنیر خان محمد تکل، د هېواد جمهور رئیس محمد اشرف غني سره وکتل او د اوبو د چارو د تنظیم ملي ادارې په کړنو او فعالیتونو یې هر اړخیز بحث وکړ.
په دغه لیدنه کې د هېواد جمهور رئيس محمد اشرف غني د اوبو د چارو د تنظیم ملي ادارې کړنې او فعالیتونه و ارزول، جمهور رئيس په خپلو خبرو کې د هېواد په لویو او وړو پروژو کې د مثبتو تغیراتو راوستو ته په کتو ښاغلي تکل ته وویل "د هېواد د لومړۍ درجې مسؤل په توګه د پراختیاي پروژو په ځانګړي ډول د لویو بندونو د رغولو او سالم مدیریت په برخه کې ستاسو د کړنو قدرداني کوم، زه د اوبو د چارو د تنظیم ملي ادارې کړنې څارم، تاسو د اوبو مدیریت په برخه کې چې کوم نوي پروګرامونه په لاره اچولي د ستاینې وړ دي، زه ډاډ درکوم، چې اړونده ادارې به په ټولو برخو کې د اوبو د چارو د تنظیم ملي ادارې سره همکارې وي، تاسو مخکې ورځئ حکومت او ملت در سره دي، د هېواد اوبه مدیریت او مهار کړئ."
همدارنګه ولسمشر محمد اشرف غني زیاته کړه چې "د اوبو د چارو د تنظیم ملي ادارې ته به ځانګړې پاملرنه کيږي؛ او ولس ته ډاډ ورکوم چې د هېواد اوبه به مدیریت کیږي او افغان دولت د اوبو مهار ته ژمن دی."
ورپسې ښاغلي تکل د هېواد ولسمشر ته د خپلو کړنو، فعالیتونو او وروستیو پرمختګونو په اړه راپور وړاندې کړ او زیاته یې کړه، د اوبو د چارو د تنظیم ملي اداره د هېواد پر کچه متوازنې پراختیا ته ژمنه ده، اوسمهال د اوبو د چارو د تنظیم ملي اداره د هېواد په سطحه په مختلفو ولایتونو سلګونه، د چکډم، کانالونو، کاریزونو، ګبیوني او استنادي دېوالونو، بندونو، لوي ۔ متوسط او کوچنۍ پروژې تر لاس لاندې لري؛ چې په روان کې به د یو شمېر لوې بندونه ګټې اخیستنې ته وسپارل شي چې پر مټ به یې د هېواد خړې دښتې زرغونه شي؛ په میلیونه هکټاره کرنیزه ځمکه خړوبه شي؛ په ملیاردونو متر مکعب اوبه به مهار شي؛ د پام وړ بريښنا به تولید کړي او همدارنګه په سلګونه کسانو ته به د کار زمینه برابره کړي.
ښاغلي تکل په خپلو خبرو کې له جلالتماب ولسمشر محمد اشرف غني څخه مننه وکړه چې د پراختیاي پروژو پلي کولو او د هېواد اوبو مهارولو ته ټينګه اراده لري؛ وخت نا وخت د اوبو د چارو د تنظیم ملي ادارې رهبري سره له نږدې ناستې کوي او د دغه ادارې کړنې تعقیبوي.
هغه زیاته کړه مننه کوم چې پر ما مو د دومره ستر مسؤلیت باور کړی؛ د اوبو د چارو د تنظیم ملي ادارې د ټولو کار کوونکو په استازیتوب ډاډ درکوم چې تر خپل توان به هڅه کوو تر څو د هېواد اوبه مدیریت او هېوادوالو ته مو د ګاونډيو هېوادونو پر ځای په داخل د هېواد کې د کار زمینه برابره کړو، هغه باور چې تاسو پر موږ کړی موږ ژمن یو چې دغه راکړی مسؤلیت به په ښه توګه ادا کوو؛ په نږدې راتلوونکي به ولس ته د یو شمېر لویو پروژو د افتتاح خبر ورکړو.
په اخر کې د هېواد جمهور رئيس ښاغلي تکل ته ډاډ ورکړ چې دی د لومړۍ درجې مسؤل په توګه د اوبو د چارو د تنظیم ملي ادارې سره د پراختیاي پروژو په پلي کولو کې مرسته کوي او وخت نا وخت به د دغه ادارې مسؤلینو سره له نږدې تعقیبوي.
