د اوبو او انرژي وزارت د اوبو معینیت نوولسمه تخنیکي ناسته ترسره شوه
دا ناسته د اوبو او انرژي وزارت د اوبو معین ښاغلي انجنیر مجیب الرحمن عمر آخند زاده تر ریاست لاندې د اوبو سکټور د مرکزي رئیسانو او د وزارت د سلاکار ښاغلي ډاکټر غلام فاروق اعظم په ګډون کې ترسره شوه.
په دغه ناسته کې، پریکړه وشوه چې د هغو پروژ معلومات دې د کرهڼې وزارت څخه و غوښتل شي، چې د کرهڼې وزارت څخه د اوبو او انرژي وزارت ته را انتقال شوي دي.
په دې تخنیکي ناسته کې، د سطحي اوبو ریاست رئيس د یوه پرژنتیشن په ترڅ کې د هیواد په کچه د اوبو سټیشنونو د ارقامو، د سټیشنونو څخه د اوبو د ارقامو راټولولو د څرنګوالي، د اوبو د اندازه ګیري د بهیر د ډولونو ، د سټیشنونو د ډیتا د کیفیت او همدارنګه د سټیشنونو د ساتنې او پالنې په هکله د غونډې ګډونوالو ته هر اړخیز معلومات وړاندي کړل.
د اوبو او انرژي وزارت د اوبو ښاغلي معین په دې ناسته کې د چارو د ښه پرمخ وړلو لپاره رئيسانو ته لازم تخنیکي هدایات ور کړل او زیاته یې کړه، چې ټول رئيسان دې د خپلو ریاستونو پلانونه د پرزینټیشن په ترڅ کې د اونۍ په تخنیکي ناسته کې ګډونوالو ته وړاندي کړي.
