د اوبو او انرژي وزارت سرپرست وزیر د Schiller نړیوال انستیتیوت له ارتباطي غړو سره وکتل
د اوبو او انرژي وزارت سرپرست وزیر ښاغلي ملا عبداللطیف منصور نن له غرمې مخکي د خپل کار په دفتر کې د Schiller نړیوال انستیتیوت له ارتباطي غړو سره ولیدل.
په دغه لیدنه کې، د یاد انستیتیوت ارتباطي غړو په افغانستان کې د اوبو بندونو د جوړولو او د انرژي د تولید په برخه کې د سترو شرکتونو د پانګونې د جلبولو ژمنه وکړه.
د اوبو او انرژي وزارت سرپرست وزیر د یاد انستیتیوت له ارتباطي غړو سره په کتنې کې په هیواد کې د اوبو بندونو د جوړولو او د انرژي د تولید په برخه کې د زمینې برابرولو ژمنه وکړه او زیاته یې کړه" په افغانستان کې د اسلامي امارت په واکمنیدو سره، په ټول هیواد کې امنیت ټینګ شوی او مونږ ټولو هغه کورنیو او بهرنیو شرکتونو ته چې غواړي په افغانستان کې د اوبو بندونو د جوړولو او د انرژي د تولید په برخه کې پانګونه وکړې، د هر راز همکاري ژمنه کوو. "
د یادولو وړ ده، چې د Schiller نړیوال انسـتیتیوت ارتباطي غړو د اوبو بندونو د جوړولو او د انرژي د تولید په برخه کې د شرکتونو د پانګونې د جلبولو په موخه خپله وړاندیز شوې طرحه د اوبو او انرژي وزارت له سرپرست وزیر سره شریکه کړه.
