کندز ولایت کې د یوه کانال د پاکاري او د اوبو ذخیرې د جوړولو چارې د یو میلیون او سل زره افغانیو په ارزښت پيل شوې
د کندز ولایت په خان آباد ولسوالي کې د یوه کانال د پاکاري او د اوبو د ذخیرې د جوړولو چارې د یو میلیون او سل زره (۱۱۰۰۰۰۰) افغانیو په ارزښت د پنج آمو سیندیزې حوزې عمومي رئيس ښاغلي انجنیر رفیع الله مجتبی او یو شمېر نورو سیمه اییزو مسؤلینو په شتون کې پیل شوې.
د کانال د پاکاري چارې چې د ۶۰۰ زره افغانیو په ارزښت د خان آباد ولسوالي په امر خیلو کلي پيل شوې، د ګڼو کسانو لپاره د کار زمینه برابره شوې ده.
همدارنګه د اوبو ذخیرې جوړولو چارې چې د ۵۰۰ زره افغانیو په ارزښت د خان آباد ولسوالي په اکاخیلو کلي پيل شوې او د چارو تر بشپړېدو وروسته به د ۴۵۰ کورنیو لپاره د څښاک اوبه چمتو شي.
د یادو پروژو چارې د آلمان هېواد د اوبو سکتور د بشرپاله مرستو په مالي ملاتړ پرمخ وړل کېږي.
