په ننګرهار ولایت کې د څه باندې ۳۵ زره آمریکایي ډالرو په ارزښت د یوه استنادي دېوال د جوړولو چارې پيل شوې
د ننګرهار ولایت په کامې ولسوالي کې د پنځه دیرش زره، نهه سوه او نهه څلوېښت(۳۵۹۴۹) آمریکایي ډالرو په ارزښت د یوه استنادي دېوال د جوړولو چارې د ننګرهار سیندیزې حوزې مسؤلینو، د کامې مرستیال ولسوال او یو شمېر قومي مشرانو په ګډون پيل شوې.
نوموړی دېوال ۶۸۰ متره اوږدوالی لري او چارې یې د یو ان ډې پې سازمان په مالي ملاتړ د ننګرهار سیندیزې حوزې په همکاري پرمخ وړل کېږي.
د دغې پروژې چارې به د درې میاشتو په موده کې بشپړې شي او پکې ګڼ شمېر کسانو ته د کار زمینه برابره شوې ده.
په ورته مهال، د ننګرهار سیندیزې حوزې مسؤلینو د ننګرهار ولایت د پچیراګام ولسوالي اړوند د سلیمانخیلو اګام تنګي سروې د بند جوړولو په موخه ترسره کړه.
