د پکتیا ولایت پراختیايي پروژو د چارو د چټکتیا په اړه ناسته
د اوبو د چارو د تنظیم ملي ادارې لوی رئيس ښاغلي انجنیر خان محمد تکل په خپل کاري دفتر کې په ولسي جرګه کې د پکتیا ولایت استازي ښاغلي محمد ابراهیم غښتلي سره وکتل. په دغه ناسته کې دواړو لورو په پکتیا ولایت کې د اوبو د چارو د تنظیم ملي ادارې اړوند پراختیاي پروژو په ځانګړي ډول د اوبو او بريښنا بندونو په اړه خبرې او د نظرونو تبادله وکړه. په پيل کې د پکتیا ولایت محترم استازي ښاغلي غښتلي د اوبو د چارو د تنظیم ملي ادارې د رهبرۍ د کړنو قدرداني وکړه او د پکتیا ولایت د ولس غوښتې، وړاندیزونه او اندیښنې د دغې ادارې له لوی رئيس ښاغلي تکل سره شریکې کړې. ښاغلي تکل د پکتیا محترم استازي ته ډاډ ورکړ چې د مچلغو بند چارې به پر وخت او ښه کیفیت تر سره کیږي؛ د دې تر څنګ به په راتلوونکي کال کې د "سورۍ خوله" بند چارې پيل شي او تر څنګ به یې د هغو پراختیاي پروژو چې د سړې هوا له امله یې چارې ځنډېدلي د ۱۰ چکډم نویو پروژو چارې پيل شي. د یادونې وړ ده چې په پکتیا ولایت کې څلور متوسطو بندونه (نري، درنګ، ګویان، تورګانی) په راتلوونکي پلان کې دي چې په نوبت او د پلان مطابق به یې چارې پيل کیږي. د اوبو د چارو د تنظیم ملي اداره
