په ۱۴۰۰ کال کې به په لغمان ولایت کې د ۲ بندونو او ګڼو نورو پروژو چارې پيل شي.
د اوبو چارو د تنظیم ملي ادارې لوی رئيس ښاغلي انجنیر خان محمد تکل په خپل کاري دفتر کې د لغمان ولایت والي ښاغلي رحمت الله یارمل سره په دغه ولایت کې د اوبو مدیریت پراختیايي پروژو په اړه خبرې وکړې.
په دغه ناسته کې د لغمان ولایت والي لومړی ښاغلي تکل ته د کمال خان بند د بشپړېدو مبارکي وویله او د اوبو مدیریت په برخه کې یې د دغې ادارې د رهبرۍ کړنې او فعالیتونه وستايل.
وروسته ښاغلي يارمل د اوبو مدیریت په برخه کې د لغمان ولایت د ولسونو ستونزې له ښاغلي تکل سره شریکې کړې او په دغه برخه کې یې د لا ډيرې همکارۍ او د چارو د چټکتیا غوښتنه وکړه.
وروسته ښاغلي تکل په نوبت سره په لغمان ولایت کې د ټولو پروژو په اړه مفصل معلومات وړاندې کړل، هغه زیاته کړه" د شاهي کانال د لومړي لاټ چارې په چټکۍ سره روانې دي؛ دويم لاټ یې د تدارکاتو په پروسه کې دی؛ دریم لاټ یې تر ډيزاین لاندې دی او څلورم لاټ یې په راتلوونکي پلان کې دی چې په نوبت سره به د دغه کانال چې يوه لویه او ملي پروژه ده چارې بشپړې او ګټې اخیستنې ته سپارل کیږي."
همدارنګه ښاغلي تکل زیاته کړه، چې په ۱۴۰۰ کال کې به د (وطن ګټو او کله ګوش) بندونو تر څنګ د څو نورو پروژو چې پلان کې دي چارې پيل شي. په دغو پروژو کې کوچني بندونه، کانالونه، سربندونه، ګبیوني او استنادي دېوالونه شامل دي.
همدارنګه ښاغلي تکل د لغمان ولایت سیندیزې فرعي حوزې ریاست او د برنامو د انسجام ریاست ته دنده وسپارل شوه تر څو د پيرخېل د استنادي دېوال موضوع وڅېړي او نتیجه یې د اوبو چارو د تنظیم ملي ادارې مقام سره شریک کړي.
د اوبو چارو د تنظیم ملي اداره
