د اوبو او انرژي وزارت او عزیزي انرژي شرکت د تخنیکي مسؤلینو ترمنځ د ګډو همکاریو د پيل په موخه د همغږي ناسته ترسره شوه
نن،دوشنبه( د ۱۴۰۴ لمریز کال د زمري میاشتې په ۱۳ نېټه) د اوبو او انرژي وزارت د تخنیکي مسؤلینو او د عزیزي انرژي شرکت د استازو ترمنځ د انرژي په پروژو کې د ګډو همکاریو او همغږیو رامنځتهکولو په موخه د همغږي ناسته ترسره شوه.
دغه ناسته د انرژي معین محترم الحاج ملا عبدالهادي یعقوب تر مشري لاندې د سلاکارانو، رئيسانو، د وزارت د تخنیکي مسؤلینو او د عزیزي انرژي شرکت د استازو په شتون کې ترسره شوه.
په دغه ناسته کې، د انرژي پروژو د چارو پيل د څرنګوالي، د فعالیتونو پرمخ وړلو د بهیر او پروژو د لومړیتوب بندي په هکله بحث او د اندونو تبادله وشوه.
همدارنګه، د ناستې په بهیر کې پرېکړه وشوه، چې د دواړو لورو تخنیکي ټیمونه دې سر له سبا د سرچینو او مطالعاتو د ارزونې په موخه د بېلابېلو ولایتونو د پروژو سیمو ته سفر وکړي او د خپلو ارزونو پایلې دې له وزارت سره شریکې کړي.
د یادونې وړ ده، چې تر دې مخکې، د اوبو او انرژي وزارت او د عزیزي انرژي شرکت ترمنځ له بېلابېلو سرچینو څخه د انرژي تولید لپاره د ۱۰ زره مېګاواټه په وړتیا برېښنا د تولید د پانګونې یو تفاهملیک لاسلیک شوی وو.
