د فلزي عناصرو د تولید تصدی ریاست عواید د تیر کال په پرتله د 3 میلیونه افغانیو لوړه شوی ده.
د فلزي عناصرو د تولید تصدی ریاست د عالی شورا غونده د اوبو او انرژۍ وزارت د اوبو مرستیال ښاغلی انجنیر خان محمد تکل په مشرۍ او د دې وزارت د فلزي عناصرو د تولید تصدی رییس ښاغلی محمد تمیم بهادرزی، د مالیې وزارت د تصدی عمومی رییس ښاغلی شفیق الله شهرانی او د اقتصاد او تجارت وزارتونو استازو په شتون سره د ۱۳۹۸ کال د مالی پلان د بیاکتنه په موخه د اوبو او انرژۍ وزارت په اوبو معینیت کې ترسره شوه.
پدی ناسته کې لومړۍ د فلزي عناصرو د تولید تصدی رییس ښاغلی محمد تمیم بهادرزی د دې ریاست تر لاندې پروژو په اړه لکه د نغلو او د غوربند بندونو د دروازو جوړولو او.... معلومات وړاندې کړ او زیاته کره: چی په ۱۳۹۸ کال کې د دې ریاست عواید ۱۰ میلیونه افغانیو ته رسیږي.
په ورته وخت کې، د اوبو مرستیال ښاغلی تکل د دې ریاست د فعالیتونو د لا پراختیا په ځانګړي توګه له پنجشیر ولایت څخه کابل ته د اوبو د لیږد پروژې لپاره د اوبو پایپ لاین جوړولو، ټینګار وکړ.
دا په داسې حال کې ده چې په ۱۳۹۷ کال کې د فلزي عناصرو د تولید تصدی ریاست عواید ۶ میلیونه ۹۱۸ زرو افغانیو ته رسیږي. چی د دې رقم سره د دی ریاست د سږ کال عواید د تیر کال په پرتله د 3 میلیونه افغانیو لوړه شوی ده.
