د یوه افغان او روسي شرکت مسؤلینو د کندهار ولایت د لوري بند له سیمې څخه د نوموړي بند د سروې او تخنیکي مطالعاتو د ترسره کولو په موخه لیدنه وکړه
د ارغنداب سیندیزې فرعي حوزې د رئيس محترم ملا سید محمد شرافت په مشري د دغه ریاست تخنیکي ټیم او ورسره مل د افغان- جرمن باختر شرکت او د روسیې هېواد د اوبو او انرژي انسټیټوټ مسؤلینو د کندهار ولایت د ارغستان ولسوالي د لوري بند له سیمې څخه لیدنه وکړه.
د نوموړو شرکتونو مسؤلینو د لوري بند د سروې او تخنیکي مطالعاتو د ژر تر ژره پيل په موخه لېوالتیا څرګنده کړه.
د یادونې وړ ده، چې څو ورځې وړاندې د نوموړو شرکتونو مسؤلینو د اوبو او انرژي سرپرست وزیرمحترم الحاج ملا عبداللطیف منصور سره په لیدنه کې د لوري بند په پروژه کې پانګونې او د نوموړي بند د سروې، تخنیکي مطالعاتو او ډیزاین لپاره چمتووالی څرګند کړی وو.
