په تخار ولایت کې د آمو سیند څنډو د ټینګښت د نهم لاټ پروژې چارې ۴۰ سلنه بشپړې شوې دي
۱۴۴۸/۶/۳ هـ.ق مطابق ۱۴۰۵/۸/۲۳ هـ.ل
د آمو سیند څنډو د ټینګښت ریاست مسؤلینو د تخار ولایت د درقد ولسوالي په یتیم تپه سیمه کې د آمو سیند څنډو د ټینګښت د نهم لاټ پروژې د چارو له بهیر څخه څارنه وکړه او د چارو پر لا ښه کیفیت باندې ټینګار وشو.
دغه پروژه د هېواد د اوبیزو سرچینو د غوره او اغېزمن مدیریت په برخه کې د اوبو او انرژي وزارت له اړینو پروژو څخه ده، چې چارې یې تر اوسه پورې ۴۰ سلنه بشپړې شوې دي.
یاده پروژه ۱۱۵۰ متره اوږدوالی لري، چې چارې یې د اوبو او انرژي وزارت له پراختیایي بودجې څخه د ۸۱ میلیونه، ۵۰۳ زره او ۵۳۸ افغانیو په لګښت پرمخ وړل کېږي.
