د اوبو د چارو د تنظیم ملي اداره کې د غور ولایت د فیروز کوه ښار د اوبو رسونې شبکې د پروژې وضعیت څېړلو په موخه د همغږۍ ناسته وشوه.
دغه ناسته د اوبو د چارو د تنظیم ملي ادارې د لوی رئیس ښاغلي انجنیر خان محمد تکل په مشرۍ، د دغې ادارې تخنیکي مرستیال انجنیر احمد ویس بصیري، په ولسي جرګه کې د غور د خلکو د استازو، د کلیو او پراختیا وزارت د استازو او د اوبو رسونې شرکت استازي په شتون کې جوړه شوه.
دغه راز په دغه ناسته کې د غور ولایت مرستيال والي حبیب الله رادمنش، د هریرود مرغاب سیندیزې عمومي حوزې رئیس عمر اسحاق او د غور سیندیزې فرعي حوزې رئيس محمد یعقوب هم په انلاین بڼه ګډون کړی وو.
په دغه ناسته کې هغه راپور چې څه موده وړاندې د هریرود مرغاب سندیزې عمومي حوزې د عمومي رئيس په مشرۍ سیمې ته د سرچینو د موندلو په موخه يو ټيم تللی وو وڅېړل شوو.
د ټاکل شوي هيئت هر اړخیز راپور ته په کتو پرېکړه وشوه چې د فیروز کوه ښار د اوبو رسونې شبکې لپاره سرچینه دې د (ګرمابک چینه) وټاکل شي.
په ورته وخت کې د اوبو د چارو د تنظیم ملي ادارې لوی رئیس ټينګار وکړ، چې د اوبو د چارو د تنظیم ملي ادارې، د کلیو او پراختیا وزارت او د اوبو رسونې شرکت لخوا ګډ ټيم جوړ او ژر تر ژره د دغې پروژې د سروې او ډيزاین چارې پيل کړي.
دا په داسې حال کې ده چې له دې وړاندې هم په مسلسل ډول د اوبو د چارو د تنظیم ملي اداره کې د اړونده ادارو، د ولس استازو او د غور ولایت مسؤلینو په شتون کې د غور ولایت د فیروز کوه د اوبو رسونې شبکې پروژې په اړه ناستې شوي او د اړونده ادارو استازو سره په همغږۍ د دغې ادارې ټاکل شوي هيئت لخوا سیمه له نږدې څېړلې او د فیروز کوه ښار د څکلو اوبو د سرچینو سیمه یې دقیقه او هر اړخیزه مطالعه او موندلې دي.
